Tipuletak

Landare hau tipularen antzekoa da. Erraboil txikia du eta hostoen zati batzuk jan daitezke.

Tipuletak luzeak eta estuak dira. Zapore gozoa eta leuna dute, beraz, gordinik edo prestatuta jan daitezke, makina bat plateretan.

Itxura

Zuriak dira, zurtoin berdea dute, eta sortetan saldu ohi dira.

Zaporea

Zapore leuna dute, testura mamitsua eta, aldi berean, kraskakorra. Zurtoin berdea zaporea areagotzeko erabil daiteke, xehatuta, tipulinarekin edota perrexilarekin egiten dugun bezalaxe.

Erosketarako eta kontserbaziorako aholkuak

Tipuletaren garaia udaberriaren bukaeratik udararen amaieraraino doa. Orduan egoten dira batu berriak eta zaporerik onena edukitzen dute. Zati zuria irmoa eta distiratsua izan behar da, hezetasunik eta likatasunik gabea. Zurtoina sendoa izan behar da, eta zimeldutakoak saihestu behar dira. Ez dira plastikozko poltsatan jaso behar; izan ere, hezetasun handia dute, eta horrek azkar usteltzea eragiten du.