Wasabi

Wasabia Japoniako ongailu bat da, eta izen bereko landarearen sustraitik ateratzen da. Landare hori Wasabia japonica, Cochlearia wasabi edota Eutrema japonica deituriko errefau min bat da, eta brassicaceae-en (kruzifero ere deiturikoak) familiakoa da. Familia horretakoak dira baita ere arbia, ziapea eta aza.

Oso zapore mina du, eta gehienbat, sushia bustitzeko erabiltzen da, soja-saltsarekin nahastuta. Oro har, arrain edo haragi-platerak apaintzeko erabiltzen da.

Mintasun hori sudur-barrunbeetatik pasatzen diren lurrunetan dago gehienbat, eta erremin sentsazioa eragiten dute horiek. Hala ere, sentsazio horrek denbora gutxi irauten du, txileak eta piperminak sortutakoak ez bezala. Wasabia naturalki sortzen da, soilik Japonian eta Sajalin uhartean.