Bisigua

Gorputz altu eta estuko arraina. Bular-hegatsaren gainean -albo-lerroaren parean- orban beltz bat daukalako eta bizkar-hegatsak jarraituak dituelako bereizten da (lehenengo arantzak oso gogorrak ditu, eta atzekoak bigunak). Bizkarra gorria du, saihetsak argiagoak eta sabela zilar-kolorekoa. Normalean kilo bat eta 1,5 kilo artean ibili ohi da.

Batez ere Kantauri aldean eta Atlantikoan dago, eta krustazeoez elikatzen da gehienbat.

Urte osoan arrantzatzen da, baina hilik onenak abendua eta urtarrila direla uste da.

Freskotasuna begian antzematen zaio, begien kolore ilunean.

Arrain erdikoipetsua eta ur gazikoa da, urte-sasoien arabera koipe gehiago edo gutxiago izaten badu ere.