Erabilerak: Txarkuterian erabiltzen da aparatu hau, masa fin-finak egiteko eta gaiak oso fin txikitu edo xehatu behar diren elaborazio guztietarako. Txarkuteroa trebea baldin bada, erabil dezake makina hau txikitzeko makina konbentzional baten modura, oratzeko lana aurrezteko abantailarekin, zeren kuterrean txikitu eta oratzeko lanak, biak batera egiten baitira. Kuterra emultsioak egiteko erabiltzen da asko, bai hotzean (saltxitxak, mortadela, etab.) eta bai beroan (gibel-orea, etab.).

Segurtasuna eta garbitasuna: Kuterra oso makina arriskutsua da berez, baina segurtasun-sistema handiak dauzka. Eta horietan garrantzitsuena, tapa altxatzean makinaren martxa blokeatzen duena da. Badu gero larrialdietan gerarazteko botoi bat ere (gorria). Eta badu, baita, garbiketarako etengailu bat ere, tapa irekita egon arren kubeta mugitzeko aukera ematen duena. Ur beroarekin eta detergente egokiarekin garbitu behar da. Hortz-arteak garbitzeko eskuila berezi bat erabiltzen da.

Funtzionamendua: Kuterrak bi mekanismo bereiz ditu: kubeta, batetik, mugimendu zirkular horizontala duena, eta hortzak, bestetik, mugimendu zirkular bertikala dutenak. Lehenengo, hortzak jarri behar ditugu beti martxan, eta gero kubeta. Eta mekanismo horietako bakoitzak bi abiadura ditu, landu behar den produktuaren arabera; dena dela, normalean abiadura txikitik hasten da, gero handiago batekin bukatzeko. Abiadura bera erabiltzen da beti hortzetan eta kubetan.