Haragia txikitzeko makina

Erabilerak: Bere sareta eta hortz desberdinekin, eta gaiarekin zer egin nahi den kontu, hainbat tamainatako jaki-puskak txikitzeko erabiltzen da makina hau. Ez da komeni tenperatura epel edo beroan erabiltzea, bestela haragi guztia trabatu egiten da-eta txikitzeko garaian.

Funtzionamendua: Lehenengo, makina muntatzetik hasiko gara. Blokea ipiniko dugu aurrena, eta gero doitu egingo; hurrena, amaigabea ipiniko diogu; ondoren, hortzak eta sareta, zertarako beharko ditugun kontuan izanez; gero, eusteko eraztuna, eta azkenik, haria. Makina muntatua daukagunean entxufatu egingo dugu, eta, pixkana-pixkana, txikitu beharreko haragia sartzen hasiko gara. Oso garrantzitsua: makina ez da inoiz ere haragirik gabe martxan eduki behar, bestela hortzak eta sareta berotu egiten baitira, eta gerta liteke haragiari hondatzeraino kalte egitea.

Segurtasuna eta garbitasuna: Eskua ez da inoiz ere haragia sartzen den zuloan sartu behar. Garbitzeko orduan, makina desmuntatu egiten da, eta lan hori makina desentxufatuta dagoela egin behar da beti. Piezak garbitzeko lana arraskan egin behar da, eta makina detergente egoki batekin eta urarekin garbitu. Arreta berezia jarri behar da altzairu herdoilgaitzezkoak ez diren piezekin: ondo-ondo lehortu behar dira eta jateko olioarekin igurtzi, herdoildu ez daitezen.