Sanguina laranjak

Laranja gorria edo sanguina laranja laranjen (Citrus × sinensis) aldaera bat da, eta mamia gorri iluna du, masusta gorrien zukuaren antzekoa. Laranja arruntaren mutazio bat da, beharrezko baldintzak daudenean modu naturalean gertatzen dena. Laranja gorrien garaia abendutik maiatzera bitartean izaten da. Kolorazio honen maila gauaren eta egunaren arteko tenperatura aldaketen araberakoa izaten da, baita aldaeraren araberakoa ere. Kolorea fruta hazten ari den garaiko tenperaturarengatik zehazten dela uste dute adituek.

Laranja arruntak baino zapore garratzagoa izaten du. Aldaeraren arabera, pixka bat txikiagoa izaten da, eta azala gogorragoa eta zuritzeko zailagoa du, baina testura eta kolorea laranja arruntaren antzekoak izaten dira. Batzuetan leunagoa izaten da, gorrixka zati batzuetan, eta hazi gutxi izaten ditu. Mamiaren gorri ilun berezi hori antozianinek sortzen dute. Pigmentu familia bat dira horiek, lore eta fruta askotan arruntak dira (ez ordea zitrikoetan) eta propietate antioxidatzaileak dituzte.

Laranja mota hau, sarritan, pomeloaren eta mandarinaren arteko hibrido gisa deskribatzen da, baina laranja gozoaren mutazio bat da, zeina hibrido bat den berez.
Europa mailan, AranciaRossadi Siciliak (Siziliako laranja gorria) Adierazpen Geografiko Babestuaren estatusa du.